{ LIFESTYLE }
12 Jan 2017
再痛都要放手!5個感情已走到盡頭的跡象

結束愛情長跑拉埋天窗,確實係可喜可賀〜不過亦有好多拍拖好多年既情侶,慢慢就走到盡頭,旁人以為打風都打唔甩,不過都係要分手!究竟係咪拍得耐就得?只係唔甘心一齊咁多年但冇結果?純粹唔捨得?但如果有以下跡象,代表呢段感情已經唔值得你再留戀,都係早日放手啦!



1. 令你對自己失去信心


同對方一齊既日子完全冇安全感,對方亦冇肯定過你既價值,令本來充滿活力同自信既你,變得一日到黑覺得自己好冇用,樣樣都唔好!不如搵過識得珍惜你既人,就算呢個人未出現,首先你要珍惜自己呀〜



2. 你地既世界只有對方

啱啱拍拖果時梗係想日見夜見,成日都掛住〜不過日子耐左,一段感情令你地唔會再追求個人成長,唔再有社交圈子,甚至唔想工作,咁就要諗下呢段感情發生左咩事喇!



3. 你被嚴重控制

去邊都要報告,只要佢唔鐘意連屋企人都唔可以見,返咩工都要問過佢...佢對你既控制已經遠遠超過關心既level,唔好被語言偽術呃到,咁樣唔係愛,只係當你係佢既物件/ 寵物咋!



4. 你地想要既未來唔一樣

你希望日後移居外地,但佢只愛香港;佢想生返幾件,但你覺得生仔實在害左佢...雖然聽落好遙遠,或者你地未認真討論過,不過咁大既差異,確實對你地既感情有重要影響架!


5. 你冇法做自己

係佢面前,你永遠要扮另一個人咁,怕佢唔鐘意,證明佢認識既根本唔係真正既你,所以要放膽表達自己真正一面,佢唔接受既〜代表佢根本唔啱你囉!



以上5點,唔知你又中唔中呢?快d諗方法解決啦!


source: indiaearl.com


News
Feature
Blog
Load more
 
NOTIFICATION