{ BEAUTY }
10 Jan 2019
平民燕窩!?冬日必食滋潤養顏孖寶



講到養顏補品一定諗起燕窩,不過燕窩又比較貴,又聽人講食完易吸收容易肥~想養養顏又滋潤下,梗係要食今日介紹嘅「植物界燕窩」,養顏孖寶「桃膠」同「雪蓮子」啦!

 


先講下雪蓮子,來自雲南,又名皂角米。外型一粒一粒,浸泡後就會變得晶瑩剔透,煮完仲有煙煙韌韌嘅口感添!



 

而佢究竟有咩好呢~雪蓮子含膳食纖維、蛋白質同Omega-3,有潤肺去痰、養肝、通便嘅功效。最重要係咩?係補充膠原蛋白啊!!!!滋養肌膚回復彈性,果然係「植物界燕窩」!

 


雖然講到好好,但因為雪蓮子性溫,多食會容易上火,尤其是大肚婆唔好食太多,感冒、燥熱人士都唔好食喇。

 


桃膠近期都好hit,什至有火鍋店將桃膠加入湯底,打造美人鍋!桃膠係桃樹樹皮裂開所流出嚟嘅樹脂液,最後凝結得出嚟嘅固體天然樹脂。

 


而桃膠同樣需要浸泡,煮過之後口感會似啫喱。功效方面除咗有生津解渴、舒降血脂膽固醇同高纖之外,佢同樣含有植物性膠原蛋白架!不過如果濕重同腎臟唔太好嘅朋友就不宜食太多喇!

 




咁可以點整嚟食呢!桃膠同雪蓮子都可以配上唔同食材,最常見都係煮糖水喇。唔少人都會加入牛奶、冰糖去整燉鮮奶。另外冬天都可以配搭蓮子、百合、紅棗、木瓜同桂圓去煲,感覺就更加滋潤!

 


而煮之前記得將桃膠同雪蓮子浸過夜,同埋糖分控制都要得宜!今個冬天記得要試下喇!

 

Sourceinstagram#桃膠   instagram#皂角米

News
Feature
Blog
Load more
 
NOTIFICATION