{ FORUM - LOVE }
Search
Title / Tags Author

查看: 6629|回覆: 33

仲應唔應繼續落去?(NO FB)

[複製鏈接]

註冊日期: 2017-12-28

發表於 2018-2-5 12:57 | 顯示全部樓層 |閱讀模式
超級長,慎入~
當日同老公拍拖半年就決定結婚,到宜家一齊只係第四年,但四年以來,大家生活上一直有磨擦,我以為互相包容下遷就一下就冇事,每當有問題出現時,我都會嘗試同佢溝通,希望佢明白我用意,亦希望佢講出佢感受,但每次都只有我講,佢從來唔肯表達自己感受,而我每次希望佢可以改善GE問題,佢都係敷衍應左我就算,但從來都冇改過。總之就係我有我講,佢有佢照做。

去年四月,佢大病入左醫院,我同公司請假(果時新入職,試用期都未過),日日留嚮醫院寸步不離咁照顧佢,後來佢好返出院,我以為佢會知道我就係陪佢走埋下半生GE人,以後大家生活會更加融洽,但事與願違,出院後,佢冇更加珍惜我不特止,陋習仲越來越多,越來越誇張。

例如:未認識我之前,佢一直都係自己一個同隻狗相依為命咁生活,家中事務都係佢自己做,(佢煮野食叻過好多女人),係一個住家男人。我以為佢同我一樣(我地都係處女座),大家都係乾淨整齊GE人,但相處耐左,先發現佢並唔係咁。佢可以幾日唔沖涼都唔覺得有問題,到我叫佢去沖,佢就開水扮沖涼(沖完個身可以完全冇香味,問佢佢就話沖左)。瞓醒唔刷牙(但比我話得多宜家終於識自覺刷牙),啲襪可以無限循環咁不停著唔肯洗(我攞走去洗,佢要著果時發現冇左先會攞對乾淨GE著,但著完又係塞返入鞋第二日再著)。沖完涼洗完頭啲毛同頭髮甩到成個浴缸都係但從來唔會執。痾尿彈到周圍都係但唔抹(已經叫過佢好多次痾完順手用張紙巾抹返,佢就一時抹一時唔抹,當然係唔抹GE時間比較多)。痾完屎有蹟佢又唔理。。。仲有好多都不能盡錄。。。我承認我係有強迫症,地下有條頭髮我都會唔舒服果種,但對住佢,我已經盡量降低要求,唔逼佢(因為我都知自己強迫症好嚴重,令身邊人好大壓力),但連基本清潔同衛生佢都配合唔倒我,我真係覺得好難頂。。我有時都唔知自己算係乜,連佢啲屎尿都要清潔埋,阿媽成日叫我唔好計,男人係咁,但問題係佢以前自己一個人住GE時候佢都會做清潔,點解娶左我返黎就變左殘廢咁乜都唔做?唔主動做都算,好多時我開到聲叫佢幫手,佢都係"哦"完就算,我等佢一日,兩日,三日,佢都係唔做,結果我又唯有自己做返。有人叫我同佢鬥懶,佢唔做就我都唔好做,我試過,唔洗衫唔拖地唔執野乜都唔做,但佢真係可以當睇唔到,繼續日日打機瞓覺如常生活。。。我真係吹佢唔脹。

未識佢果時佢已經有養狗(同前女友一齊養GE,但聽聞佢XGF唔會照顧,一向都係佢負責打理),佢隻狗基本上人人都咬,只係唔咬佢,我本身好鍾意狗,所以都唔介意幫佢照顧呢隻佢為左XGF至買GE狗(佢唔識養狗,養到隻狗好瘦,又唔識教,攪到隻狗會嚮屋企亂痾尿),上個月,有次我地一齊返屋企,佢一返屋企就放左隻狗出黎(為左避免隻狗亂痾尿,屋企冇人時我地會困佢入廚房),然後衝左入房打機乜都唔理,我果時忙住做其他野,我就同佢講:"不如你幫手執左廚房啲屎屎尿尿先啦,唔係一陣佢又亂痾尿架啦",佢:"一陣做!",隔左五分鐘,佢都未肯執,我又話:"你可唔可以執左先再打機啊?",佢:"好快!",話口未完,我咁啱嚮房走出黎,就見到牆身有篤尿(屋企新裝修,牆身物料會索水,所以幅牆即刻黃左),果刻我真係爆開了,叫話:"你就繼續唔好執由得佢!",點知佢仲鬧返我轉頭:"未話左一陣執囉!等陣得唔得呀!12點啦嘛!我(打機)個任務12點要做啊嘛!!",我話:"你隻狗又嚮牆身痾左篤尿啦!",然後我好嬲咁走入廚房清潔,掟左個垃圾桶蓋落地,砰一聲,佢聽到就大鬧"你又發乜撚野脾氣啊!",果刻我個心真係裂一裂(佢從來都冇試過用粗口鬧我),狗係佢養嘅,點解盡主人責任都要三催四請?清潔完再打機唔得嘅咩?點解仲可以大聲鬧返我轉頭?

我好愛佢,但我都係決定離婚。前晚,我簽左紙比佢,叫佢簽,佢發左我好大脾氣,然後不停數我鬧我,將佢對我嘅不滿全部講曬出黎。佢好強調話我經常唔尊重佢,又話我唔當佢係人,例如,佢有時戴完CON將眼鏡放嚮洗手盆隔離,我以為佢唔記得拎返入房,我就幫佢放返入房,點知佢話我咁樣做好唔尊重佢,鬧我點解要佢跟住我果一套去生活,但其實我只係出於好意。。再者,如果你唔鍾意我放,可以講比我知,咁我未唔再放囉,但佢又冇講,不過個心就一直計住。我聽到佢咁講,我個心真係碎曬,點解我嘅付出,嚮佢眼中會係一種束縛?係咪真係我逼到佢咁樣?但我又記得,佢以前明明話佢XGF從來唔幫手執屋,宜家娶到我好幸福。係由幾時開始,我嘅優點都變成缺點?佢講完呢件事之後,我真係覺得個心好寒,日日同我瞓埋同一張床嘅人,原來個心每日都嚮度計算緊我。嚮我眼中根本不值一提嘅事,但原來佢好介意。

自從佢大病出院後,佢開始沉迷打機(之前從來唔打機,但係會病態篤電話,冇網絡都要篤FB果種),每日一返屋企就打機,乜都唔理。(幾個月前我撞車,手腳傷曬,我有叫佢幫手做下家務,因為我真係好痛好唔方便,但佢最後係選擇左打機,我只好跛住腳拖地執屋),好多時,我想佢幫忙做少少野,佢都會話等陣,轉頭做,然後就冇左件事。呢大半年來,我同佢因為呢問題起碼鬧過十次交,但每次鬧完佢都一樣係咁,後來,我開始唔再等佢瞓,習慣自己一個睇電視,我同佢漸漸再冇交流,每日瞓埋同一張床,但永遠都係背對背,我地冇溝通,我好辛苦,我真係唔想再捱落去。

佢琴日同我講,話我以前好溫柔,佢以前覺得自己好幸福。但唔知幾時開始,我嘅溫柔消失左,佢話唔知係佢做少左定我要求多左,我地開始多磨擦,漸漸,我越叫佢做,佢就越唔想做,我同佢就越行越遠,直至我話離婚果日,我喊住講左句"你以前好錫我",佢話佢果刻個心痛左一下,佢先知道係佢自己做得唔好,希望我比個機會佢。

其實四年以來,我都唔覺得佢特別愛我,但至少,佢以前會用心陪我,會關心我,我愛佢,所以一直為佢搵藉口。佢有時講一句:"老婆,凍唔凍啊?"我都已經可以覺得好溫暖,朋友話我卑微,一句咁基本嘅說話都可以覺得感動,其實呢D都只係情侶間最基本嘅互動。我回想,我的確事事以佢為先,乜都肯為佢做,但原來,佢唔係咁認為,佢個心什至嚮度計算緊我,我嘅付出,佢全部當成束縛。

事到如今,我真係唔知應唔應該狠心同佢一刀切。我覺得我比佢傷得好深,我覺得佢好陌生,我其實係咪應該放手搵一個會珍惜我嘅男人好好再過日子?(我30,佢34,未有小朋友)
回覆
+ Favorite

舉報

註冊日期: 2016-7-2

發表於 2018-2-5 13:13 | 顯示全部樓層
如果佢都希望你比個機會佢,不如去下家庭輔導個D,睇下大家能否攤開黎傾。。。

註冊日期: 2017-12-28

 樓主| 發表於 2018-2-5 13:38 | 顯示全部樓層
Nobody111 發表於 2018-2-5 13:13
如果佢都希望你比個機會佢,不如去下家庭輔導個D,睇下大家能否攤開黎傾。。。 ...

其實我家姐都經常擔當輔導呢個角色,幫我地分析每件事,想我地當面傾清楚解決問題,但每次傾完,佢都係冇改善。

註冊日期: 2016-7-12

發表於 2018-2-5 13:46 | 顯示全部樓層
未有小朋友都好D,既然情已逝,相處又有咁多問題,長痛不如短痛。

註冊日期: 2017-12-28

 樓主| 發表於 2018-2-5 14:11 | 顯示全部樓層
其實咁耐以黎,每次有問題出現我都會平心靜氣同佢傾,但佢從來都唔肯認真傾,總之就一味逃避,下左啖氣就當冇事,所以問題一直都無限LOOP,直到今次我話要離婚,佢起初都係唔肯傾,我心死了,講埋離婚都仲係唔肯面對,咁未算囉,後來我家姐叫佢同我傾清楚,佢仲要鬧我"點解你要傾果時我就要同你傾!唔比我未準備好架?!宜家我話要傾你就話唔傾!點解下下都要我跟住你節奏去做人?!"

聽完呢句,我笑左一下,但個心真係碎曬

註冊日期: 2016-5-7

發表於 2018-2-5 14:13 來自手機 | 顯示全部樓層
我覺得你地唔係唔愛對方
係磨合唔到
兩個人生活習慣模式唔同
但就迫住一齊住
佢咩都唔做 等有人做 到你忍唔住做左 個心又有不甘
兩個唔改 無可能再一齊
男人好煩 迫佢又話迫佢
唔迫佢又唔自動自覺做

註冊日期: 2017-12-28

 樓主| 發表於 2018-2-5 14:38 | 顯示全部樓層
kt_616 發表於 2018-2-5 14:13
我覺得你地唔係唔愛對方
係磨合唔到
兩個人生活習慣模式唔同

我覺得係佢變左,以前我地會一齊打掃屋企,例如佢煮飯,我洗碗,佢掉垃圾,我拖地等等。。但時間耐左,就變左我獨自去完成所有事,什至開聲想佢一齊做,佢都唔睬我,就算肯做,都係黑住面去做。。。我真係好攰,唔識點同佢相處。

註冊日期: 2016-6-28

發表於 2018-2-5 14:43 | 顯示全部樓層
本帖最後由 Yanni_yiuyan 於 2018-2-5 14:45 編輯

其實兩個人之間既溝通真係好重要 佢呢種唔出聲但又記住既性格真係好差 樓主你都話 你一D以為好小事出於好意去做既事佢都會唔出聲然後扭曲你原意 如果你想再俾次機會大家 真係好睇佢有冇心改呢個性格 同埋你地會唔會換一種大家都舒服既溝通方式

不過我始終覺得 人既惰性同對乾淨既要求係好難改變 照你既描述 佢係一個好懶同好污糟既人 就算佢話肯改 都應該唔會維持好耐 幾愛一個人都好 生活同性格上既唔夾其實都會磨滅 就呢兩樣而言 你地其實好唔夾

就算係磨合 都要兩個人既性格同習慣唔會差太遠 或者兩邊都願意去體諒同包容 如果唔係 其實都無謂勉強一齊 再拖落去對大家既傷害會仲深

註冊日期: 2017-12-28

 樓主| 發表於 2018-2-5 15:04 | 顯示全部樓層
Yanni_yiuyan 發表於 2018-2-5 14:43
其實兩個人之間既溝通真係好重要 佢呢種唔出聲但又記住既性格真係好差 樓主你都話 你一D以為好小事出於好意 ...

SIS,真係好多謝您嘅意見,其實我個心都係咁諗。因為我知道性格唔會一時三刻可以改變,我唔想再勉強佢去做任何野,佢唔嫌我煩,我都嫌自己長氣。大家都係成年人,我冇可能時時刻刻都嚮度督促佢,佢唔自覺,我真係控制唔倒。

註冊日期: 2016-7-12

發表於 2018-2-5 15:17 | 顯示全部樓層
你都講到要離婚,佢都仲要用鬧的方式去回應你,咁其實再落去又點會有咩改善呢?

註冊日期: 2017-12-28

 樓主| 發表於 2018-2-5 15:29 | 顯示全部樓層
YYYYU 發表於 2018-2-5 15:17
你都講到要離婚,佢都仲要用鬧的方式去回應你,咁其實再落去又點會有咩改善呢? ...

呢個都係我心死嘅其中一個原因。。

註冊日期: 2016-7-12

發表於 2018-2-5 17:27 | 顯示全部樓層
其實你自己都有答案啦,唔需要上唻問大家拎認同喎,對自己的決定負責就得。

註冊日期: 2017-10-17

發表於 2018-2-5 17:38 | 顯示全部樓層
好自已好頂唔順呢d男人

註冊日期: 2017-12-28

 樓主| 發表於 2018-2-5 17:40 | 顯示全部樓層
本帖最後由 POKERFACE 於 2018-2-5 17:42 編輯
YYYYU 發表於 2018-2-5 17:27
其實你自己都有答案啦,唔需要上唻問大家拎認同喎,對自己的決定負責就得。 ...

始終都係一段婚姻,都想聽多啲人意見嘅。我怕我太自我做錯決定啫

唔係話要取暖想人認同,我只係想旁觀者幫我分析一下,到底呢段關係仲值唔值得博多次比個機會大家再黎過

註冊日期: 2017-12-28

 樓主| 發表於 2018-2-5 17:43 | 顯示全部樓層
surcharge 發表於 2018-2-5 17:38
好自已好頂唔順呢d男人

我都無諗過自己可以頂咁耐,但老公係自己揀嘅,都唔可能一遇到問題就急住放棄

註冊日期: 2018-1-15

發表於 2018-2-5 17:56 來自手機 | 顯示全部樓層
可能真係要搵一個專業婚姻輔導,決定左結婚,有難題要一齊盡力解決。

註冊日期: 2017-4-3

發表於 2018-2-5 18:35 | 顯示全部樓層
我覺得你老公有啲食硬你既心態,因為你太卑微,所以變左佢主導,有時你想既嘢佢唔配合,反而仲話你要佢跟住你既節奏生活,問題係你唔開口佢唔做,你開口又話你煩唔想做,連你病都仲要你做,咁佢係咩意思?佢搵左個工人定娶左個老婆?
一句講晒,佢太幼稚,而且又無打算為你成長為你作出改變

註冊日期: 2016-4-17

發表於 2018-2-5 20:48 | 顯示全部樓層
我覺得你決定係岩

講離婚都鬧你 真係收皮啦叫佢

註冊日期: 2016-3-8

發表於 2018-2-5 23:08 來自手機 | 顯示全部樓層
其實佢有講話,佢唔鐘意咩都你講哂,跟住佢就會愈嚟愈唔想做,更加唔會想同你傾,好似con盒咁,佢覺得不被尊重。。。

坦白講我係你老公個隻,我覺得屋企係休息既地方如果仲要好似番工咁長期keep住緊張狀態係好攰,你老公而家就係咁既狀態。唔可以話你錯,你老公咁樣都唔係錯,只係大家生活模式習慣唔同,再者男人同女人本身就唔同,你冇得迫,一係就接受,一係就離婚。。。。

不過其實我覺得你如果一人讓一步,佢既野你唔好理,但係共用既野就一定要執好,或者甚至俾佢決定分配埋,總之俾個決定權無論多或少,咁樣關係先會好。。。。

ps以上除咗狗狗d屎尿有問題外,我覺得其他都係很小事,如果你覺得真係好大問題,就係價值觀唔夾

註冊日期: 2014-12-31

發表於 2018-2-6 00:39 | 顯示全部樓層
樓上都唔知講乜9,條仔完完全全地係幼稚到極點啦,講咩生活習慣唔同?家下結婚係組織家庭呀,連隻狗都唔照顧,以後有咗小朋友會點?離婚啦,趁無小朋友,走得快好世界,希望你會搵到個識尊重你,肯溝通,原意為頭家付出嘅人!
您需要登錄後才可以回帖 登錄 | 註冊

News
Feature
Blog
Load more
 
NOTIFICATION