{ FORUM - LOVE }
Search
Title / Tags Author

查看: 59565|回覆: 27

由結到離 (長文慎入)

[複製鏈接]

註冊日期: 2019-1-25

發表於 2019-1-25 12:28 | 顯示全部樓層 |閱讀模式
第一次po文 因為有好多唔想比身邊朋友知 但又好想share 唔講我可能會痴線 大家有時間可以睇一睇 比d意見我

13年 23歲 岩岩讀完書番香港 因為離開左8年 對呢到人同事都好唔熟悉 想快d識到對象同朋友 所以每星期都落老蘭 識識埋埋一堆壞人 不停幾個月就散

14年 識到現時老公 因為之前既灰心 我降低左搵對象既條件 同佢一齊 因為佢係我呢年幾唯一識到係認真對待我既人

一齊頭三個月 都有開心既日子 慢慢開始發覺大家好多野真係夾唔到 佢係屋企獨子 又係老來得子 屋企人 好錫佢 所以佢係咩都唔識做 好多野我變左佢阿媽咁 照顧佢 幫佢做野 因為自己係外國住左8年 已經好獨立 所以我就連佢生活都一齊照顧埋 包括 幫佢交費 理財 買日用品 底衫褲 機票行程 日常生活節目安排 book位食飯 提醒佢生活事項等等 ....

因為佢只有中五畢業 工作係比較要用體力 而我剛畢業入職文員 人工係佢三分一 開始既日子 佢對我好豪爽 要咩買咩 但慢慢發現 佢一d理財觀念都冇 有幾多洗幾多 因為工作環境 身邊既人 全部係賭錢 賭馬 打麻雀 而我既生活 同佢完全唔同 我地基本上係冇咩話題可以傾到

16年 講多幾次分手 佢試試都用各種方法挽留 而我又好心軟 同埋知佢真係愛我 所以一次又一次原諒佢 係最後一次講分手 又復合後 佢突然同我求婚 佢話會學識照顧我 因為呢兩年 我湊仔湊到好攰 我話我唔想結婚後都仲要繼續咁 佢話會改 我信了 都應成左佢既求婚

17年 結婚後三個月 佢打回原形 甚至更過份 因為我地番工時間唔同 我一般係7點會番到屋企 然後自己食飯 或者煮好飯 佢會11點先番 通常我都已經要沖涼訓 佢番黎就打機 屋企家務唔做 因為佢係體力工 話好攰 番屋企想休息 但我自己除左日頭正職 仲有經營自己網店 所以我都好忙 屋企好亂 兩個人都唔執 我地開頭會吵 到之後 我係一路執一路喊

我經營自己生意 由頭到尾佢都冇參與過 我自己番大陸搵貨源 入貨 搬貨 經營 佢冇參與之餘 叫佢幫手仲話佢都有番工 佢都會攰 叫我辛苦咪唔好做 又唔係搵得多 冇錯佢呢幾年人工又加左 我網店生意 做生做死 都唔夠佢搵 佢覺得晒時間幫我手 不過佢去番一日工仲多過我

之後我就開始唔同佢講野 因為都傾唔埋 日頭工作佢唔想知 自己興趣佢唔想幫 我又好忙 食飯大家自己玩自己手機 我一埋客要處理 連鬧佢都廢事 但佢可以完全無視我 自己係到打機 唔知我已經死心

18年 壓力太大 開始上網識人 然後又識左個好肯聽我講既人 由開始 我將我同我老公相識既點滴慢慢同佢分享 到自己既事情 佢聽完話好感動 點解有咁好既女仔 你老公唔識珍惜 我聽完果刻先諗 我原來係人地眼中係好好

18年11月 我同老公攤牌 我受唔到呢種生活 我話我要既係兩個人會一齊成長 互相幫助 支持 有心事可以傾訴既對象 唔係似依家佢覺得賺錢 比錢我 佢就完左佢責任 我同佢講要分開一排

同身邊朋友講時 佢地好驚訝 係佢地眼中一直覺得我過得好好 老公收入唔差 住既地方又好 佢又唔多管我 自己想去旅行就去 但其實我地兩個生活一齊好似roommate 或者似家人咁 我地無交流

攤牌後 佢態度又180度改變 開始關心我 留意我 想我比次機會佢 但我已經好攰 我對佢已經由失望到死心 我地既婚姻只維繫左一年半 .....

好多朋友勸我唔好離 比多次機會佢 但我知道 佢永遠都唔會係我要既對象 但離婚 對我地雙方屋企都好大影響 我都好怕人地點睇我 所以一直十五十六
回覆
+ Favorite

舉報

註冊日期: 2017-5-15

發表於 2019-1-25 14:21 | 顯示全部樓層
咁你怕人地點睇你多d定係怕繼續對住個令你死心既人
既然你覺得佢永遠都唔係你要既對象, 咁咪離婚lor
你而家都係29啫, 咪博下會唔會遇到個更好同更適合自己既人

註冊日期: 2018-1-5

發表於 2019-1-25 14:42 來自手機 | 顯示全部樓層
你都已經比左甘多次機會佢,放手啦
聽你講你都仲算後生,如果保養得好唔怕搵到下一個
我有個同事,三十六歲都有第二春,個男仔仲後生過佢又高大又靚仔,搵錢搵得多。所以唔好驚,最緊要keep好自己心態同樣就會搵到幸福

註冊日期: 2017-3-20

發表於 2019-1-25 16:13 | 顯示全部樓層
如果你們一開始曾經非常相愛,之後因為生活慢慢變左質,或者都可以補救。但如果由一開始你都係求其找到個無咁差的、將就心態順其自然先行到依家,就算罷啦。就算俾你修復番去一開始,要他改既野亦改到,都只不過是兩個傾唔埋價值觀又不一樣的人,有咩意思?你想將成個故事用一樣的劇情重新一次咩?

別說你現在還年輕(應該是吧?),就算你依家40幾,都一樣可以重新開始自己過得舒服的生活,別忘了你之後還有起碼三四十年要過

註冊日期: 2017-9-29

發表於 2019-1-25 17:22 | 顯示全部樓層
本帖最後由 細VV 於 2019-1-25 17:23 編輯

會唔會係你識左第二個, 所以先更加決心要離婚? 如果無第二個出現我相信你會繼續忍...既然你個心都已經飛左去第二個到, 離婚係唯一選擇

註冊日期: 2017-8-23

發表於 2019-1-25 19:21 | 顯示全部樓層
根本你由一開始都唔係太愛佢,你只係怕搵唔到比佢更愛,更珍惜你既人,先將就自己去同佢一齊。
其實由一開始分手再復合,再結婚,已經行錯左。分開先係正確既選擇。為自己人生負責,唔好再委屈自己啦!

註冊日期: 2015-4-9

發表於 2019-1-25 20:19 | 顯示全部樓層
呢個廢人只想繼續有人俾佢倚賴

至於當事人的死活,從來不是在下會關心的事情~~

註冊日期: 2017-4-22

發表於 2019-1-25 20:37 | 顯示全部樓層
你諗下如果之後無咗佢你都過得比同佢一齊好,咁你就有答案架啦。 同埋我都好讚成呢句:兩個人一齊share ,一齊變好,一齊有經歷,咁先有意思。

註冊日期: 2018-4-7

發表於 2019-1-26 01:09 | 顯示全部樓層
唔好勉強啦!between 我地幾似

註冊日期: 2018-1-27

發表於 2019-1-26 01:32 | 顯示全部樓層
辛苦既就分開吧,人既一世時間唔多,無謂令自己咁唔開心

註冊日期: 2019-1-24

發表於 2019-1-26 06:55 | 顯示全部樓層
我覺得你同佢結婚已經係錯誤,你根本未了解清楚
我就係怕以後結左又離婚影響埋長輩D關係所以我先諗好多嘢
如果真係認為佢唔會係你想要嘅人,
咁佢應該就一世都唔會係,除非你地都變左
咁仲令自己生活得咁辛苦為咩?

註冊日期: 2016-6-15

發表於 2019-1-26 21:18 | 顯示全部樓層
我都面對同你一樣既情況
男友覺得自己搵到錢
我就自己搞啲小生意 收入不如他高 就睇唔起我既野 覺得可做可唔做 一開始起步階段就話無生意不如執左佢!
到現在買樓後開始有經濟壓力 ,我份生意仔開始有啲收入先改觀少少! 但都係覺得得佢份工係好辛苦,怪我幫唔到手

註冊日期: 2016-6-15

發表於 2019-1-26 21:19 | 顯示全部樓層
又話佢為左我孭層樓上身,次次聽到我都覺得難聽過粗口... 好似得佢一個有付出咁

註冊日期: 2016-6-15

發表於 2019-1-26 21:20 | 顯示全部樓層
我絕對明白你個種心灰意冷既感受

註冊日期: 2016-6-15

發表於 2019-1-26 21:22 | 顯示全部樓層
所以我已經決定就算同佢結婚都唔會同佢生小朋友,因為佢就係個種覺得全職媽媽係應份要服侍佢,當所有野係老鳳既人!

註冊日期: 2017-3-20

發表於 2019-1-26 23:45 | 顯示全部樓層
本帖最後由 靈靈@hk 於 2019-1-26 23:48 編輯
smokerbf 發表於 2019-1-26 21:22
所以我已經決定就算同佢結婚都唔會同佢生小朋友,因為佢就係個種覺得全職媽媽係應份要服侍佢,當所有野係老 ...

既然如此又何必要結婚

一個既看不起你做的事、對你喜愛的事也不會給支持、仲覺得他對你好係益左你的人,同他結婚比起單身有咩好處?真的結左所有事就不會再樣樣可以在你掌握之內,到時不小心有左,難道你捨得落左佢嗎

註冊日期: 2018-12-4

發表於 2019-1-27 09:50 來自手機 | 顯示全部樓層
靈靈@hk 發表於 2019-1-26 23:45
既然如此又何必要結婚

一個既看不起你做的事、對你喜愛的事也不會給支持、仲覺得他對你好係益左你的人, ...

我都唔明

註冊日期: 2017-11-6

發表於 2019-1-27 13:39 | 顯示全部樓層
婚姻唔係講玩,如果你對佢仲有感情仲有感覺,我覺得你可以試多次,反正佢而家對你好左,你就享受下佢對你嘅好先,你大可態度照舊,以前係你care你多啲,而家調番轉;倘若佢冇幾耐又故態復萌,咁你就狠心拜拜啦,唔好理面子,一個真係緊你嘅人係唔會次次都三分鐘熱度;如果你而家對佢嘅失望已經係咩都補唔番,愛莫大于心死,咁你就唔好諗,直接離婚啦,我相信你肯同屋企人溝通佢地一定明白你,比做係我我都唔捨得自己個女受苦!

註冊日期: 2015-6-8

發表於 2019-1-28 11:58 | 顯示全部樓層
襯冇小朋友, 早D走!! 真的~ 佢應該3個月後又會打回原形... 你仲想不停loop嗎? 次次要分開先好一排

註冊日期: 2009-8-20

發表於 2019-1-28 15:54 | 顯示全部樓層
唔反對你離婚,無左愛就無左,無小朋友係好事黎,唔需要考慮多樣野~我好明無話題果種感受,因為女人都係鐘意有人聽自己講野,我老公有時攰唔出聲我都唔高興,更莫講話大家食飯齋玩手機!只要你接受到經濟上會差左就得(始終你要租地方住,又無左老公嘅金錢支援,生活一定會窮左)~
「佢聽完話好感動 點解有咁好既女仔 你老公唔識珍惜 我聽完果刻先諗 我原來係人地眼中係好好」<——呢個先係我著眼點,通常呢啲人都唔係真心,而係另有所圖!唔好因爲寂莫就放下戒心!總之睇定啲先好同呢個人開始,我覺得講野咁白咁露骨嘅男人,通常講嘅野都唔係真心!(我唔係話你唔好,做人一定要覺得自己有優點!一定有人識欣賞你嘅優點!)
希望你唔好再重蹈覆轍,你今次婚姻失敗係因為你見到有人對你好而品格又唔差你就仆左埋去,完全無考慮大家相唔相處到!唔好再因爲寂莫而再錯!俾自己沈澱一下,專心工作,你會發現自己慢慢會有啲專長同優點走出黎,到時再慢慢揀男人都唔遲!唔好覺得自己一直都只吸引差男人然後就求其揀!咁你只會一直錯一直錯,一直吸引錯嘅男人!
您需要登錄後才可以回帖 登錄 | 註冊

News
Feature
Blog
Load more
 
NOTIFICATION