{ FORUM - LOVE }
Search
Title / Tags Author

查看: 1648|回覆: 2

有一種幸福叫主動-相睇實錄 #2未來外母篇 #3未來外母下

[複製鏈接]

註冊日期: 2019-10-19

發表於 2019-10-21 13:05 | 顯示全部樓層 |閱讀模式
本帖最後由 pong4211 於 2019-10-26 12:50 編輯

有一種幸福叫主動-相睇實錄(自序:44次相睇)

(按:幾年前曾經發表過《有一種幸福叫主動-相睇實錄》少部份文章,後來因開辦配對公司而暫停了寫作計劃,如今公司已上軌道亦準備會有新發展,為迎接新業務也滿足技癢之苦,立下決心寫晒所有經歷出來。可能無乜人睇過已發表的文章,故由自序開始再次不定期表發,搏君一粲)

自序:44次相睇

小王子一日睇咗44次日落,我都唔輸蝕,一生人相睇了44次。

從前我講親俾人知我相睇咗44次,好多人問我「點解要見咁多次?」而家話俾配對公司啲客知我相睇咗44次,大部份人都話「我應該唔駛咁多次!」查實呢兩句話都係廢話,正如你話張國榮唔似咁短命,咁唔該你望我吓我似有幾長命?你識睇就一早發咗達唔會搞成咁啦。

查實相睇幾多次又如何?相睇就如買六合彩一樣,好有恒心咁期期買,係就係要駛好多錢,但一舖中咗就一生無憂,正如相睇得咗就一世幸福。到你結婚擺酒時,無人有興趣問你相睇過幾多次,至多問你點相識,個故仔任你學克警咁老作講大話掩飾真相都得,皆因無得fact check。

重點係,一定要搵到結婚對象,搵唔到又一味係度自怨自艾話自己條件好好,不停問人點解搵唔到,呢啲人同入黃大仙廟唔求籤一樣,機會一直係你面前只係你無把握到。肚餓時你會落街買個飯盒,無嘢撈時去勞工署搵份工做,無對象咪要去配對公司搵對象,就係咁簡單,唔需要考慮太多嘢,坐言起行,目標為本。

我就係最好的人辦。

從傳媒人到媒人

我從前做記者,我可以講全世界最戇居的工作就係做記者,男記者咋喎,女記者唔算。你知唔知全港最有錢個女人係邊個?呢個嫁咗富豪的女人以前就係做記者,唔止呢位劉太,仲有好多女記者都嫁得好好甚至嫁富豪,但我從來無聽過有男記者娶富婆,一個都未聽過,因為根本就無!

係香港做男記者,出名人工奀工時長,無可能溝到女,搞心靈空虛!咁點算?惟有食多啲嘢令自己個肚無咁空虛,後果係點?會肥囉,肥就更加溝唔到女,心靈更加空虛,惟有再食多啲嘢令自己個肚再充實啲,周而復此惡性循環,我26歲就230磅,問你怕未!

到36歲時(無上磅10年,唔知幾多磅),已經無做全職記者改為接job,收入好好多,老婆本都儲到,剩係無老婆。我身邊好多人都介紹過女仔我識,我阿媽、契媽、阿媽啲朋友、阿姨、朋友、舊同事,連我細佬個外母都頂我唔順,介紹女仔我識,但全部都唔得。所有人都放棄我,連我阿媽都叫我唔好成日鬧兩個姪女,「喂你老咗無人無物,得兩個姪女可能或者有機會睇下有無時間嚟睇下你咋,千祈咪令佢哋僧你呀!」

咁很悲涼,點解我會搞成咁?

雖則我肥兼且樣衰,但都應該有權去搵對象,如果只有俊男美女先搵可以結婚,呢個世界咪大半數人唔結得婚?

我死唔信邪!

於是我用盡所有方法搵伴侶,一相睇就相睇了44次,總算搵到個女人肯做我老婆。不過講明,我老婆唔係第44個係第37個。點解唔係最後一個?正如你去豐澤睇啱件電器,都去埋百老匯、蘇寧同中原格過晒價,先扑鎚買啦吓嘩,貨比三家吖嘛!

自我搵到人肯嫁我,我又幫到相睇的女仔搵對象後,我忽然受到感召,本來只係想寫本書分享我相睇的經歷,有一日寫咗半個故事放上討論區,一個早上就有50萬點擊,收百幾個pm問我用邊間配對公司好?

乜原來咁多人都想搵配對公司?個市場咪好很大?不如搵我嗰間咪最好!

就係咁,我就開設了配對公司「幸‧匯」,並以「有一種幸福叫主動」為公司口號,不停接受訪問,一來宣傳生意,二來也把我的獨特經歷公諸於世,希望鼓勵更多人主動搵對象。查實好多搵唔到對象的孤男寡女,問題唔係醜樣無錢性格差,只係唔夠主動。成日有人話主動會嚇親人,呢個簡直係本末倒置,你去茶樓伙記會先幫主動出聲的人落單定眼光光得個望字的人落單吖?你主動對方先知你心意,你唔主動對方分分當你無意思,大好良緣就係咁無疾而終!

我就係最好的人辦。呢本書就係話你知,主動有乜好處!我主動,不但令我搵到個好老婆,仲成就咗我下半生的事業!

我時常講笑咁講,我以前做傳媒人,好辛苦,家下做媒人,做少啲嘢舒服好多。

但查實「唔做中,唔做保,唔做媒人三代好!」做媒人一啲都唔舒服,加上開公司時有太多嘢要處理,寫書計劃一拖就拖咗幾年,直至「幸‧匯」由人手配對發展到系統配對,先的起心肝寫番,就係你而家睇緊呢一本「有一種幸福叫主動-相睇實錄」。

有一種幸福叫主動!

查實無人需要講俾人知自己去相睇,更加無必要話俾人知相睇過幾多次,只要搵到兩情相悅的對象咪得。點解我要向全世說我相睇了44次?除咗因為想搞宣傳之外,我都好希望將「有一種幸福叫主動」理念,推動更多人坐言起行,即刻去搵對象唔好等唔好諗喇。諗無諗用架,諗極都唔會有個男人或女人係天花板跌落嚟做你老公或老婆,一定要去搵先有,正如買要六合彩先有機會中。

我就係最好的人辦。

我樣衰兼肥仲係毒男,所有負面的形容詞都可以用來形容我!我搵到老婆喇,你呢?唔通你差得過我?

我絕唔希望你抱住獵奇的心態去睇呢本書,雖然呢本書亦唔多唔少都會令你知道更多鮮為人知的相睇過程甚至秘密,但我更希望你睇完呢本書之後,可以明白「有一種幸福叫主動」這個理念,能為你和你身邊人,帶來一生的幸福!

回覆
+ Favorite

舉報

註冊日期: 2019-10-19

 樓主| 發表於 2019-10-24 11:20 | 顯示全部樓層
  當時係平日上晝十一點幾,我係自由工你地退左休就話咁得閒,你個女返緊工點見呀?阿「未來外母」? 

  原來阿「未來外母」係搞生意,個舖頭就係飲茶地方附近,行兩三條街就到。佢個女就係舖頭幫手,換句話講阿「未來外母」係老闆,隨時放人都仲得。 

  臨找數時,阿「未來外母」仲要話佢個女好恨嫁,成日話要搵人閃婚,唔好阻止佢咁話。但我問阿女咁靚,無理由無人追。 

「未來外母」:少年夫婦老來伴

  啊「未來外母」話佢個女的確好多人追,但未拍過拖(吓?唔係掛!),「有人拿住紮花係樓下等佢,佢都唔制,成32歲都未拍過一次拖,真係架,但而家好鬼恨嫁,去親人地婚禮都一定搶花球,搶到就話可以就快啲嫁,但又無男朋友喎,點嫁喎?你去見下佢啦!」 

  當時諗,又靚女又係處女?唔係咁益我掛,上天終於開眼,終於都眷顧我喇,Thanks god! 

  行去舖頭途中,契媽同阿「未來外母」不斷教我做人道理,「嗱,少年夫婦老來伴,係人都要有個伴侶架嘛,後生就講愛情,到我地呢啲年紀,同老公仲邊有愛情,得感情之嘛,最緊要有個伴,大家夾到咪得囉,你就下我我就下你,好快就一世架喇!」搞到我以為佢個女實嫁梗我咁滯。 

  行到舖頭,我先知原來檔野好大檔,幾層高,賣乜唔好講喇,總之唔係平野,係服務同物品都係價錢任佢開個隻,如果有錢人幫襯,真係一次賺一百幾十皮閒閒地。招牌上面頂頭仲有幅幾十呎相掛係度,肯肯定投資唔少嘢。。。 

  呢個時候,阿「未來外母」已經忘晒形,我估問佢乜都答,我問佢檔野投資係咪好大,佢話過千萬。。。。 

  過千萬投資喎。。。即係阿「未來外母」分分鐘有幾千萬甚至過億身家。。。嘩,大佬,靚女加處女仲要咁疊水,呢次真係錢銀女人一次過番晒黎。。。。我呢世人都未試過對前景咁有希望。。。 

  上到去,卒之見到佢個女。老實講無啲相咁靚,而且塊面有少少殘,無乜護膚打理個隻。。。。但整體都算係靚女一個。見到我,係咁咦楂個靶交換左咭片,就話有野做要番入去。。。。 

  原來上天對我的態度,一直都無改變,這些機會仍然不是我。 

  落番一樓,契媽同阿「未來外母」不斷問我點點點。。。我話「點喎,你地睇到架啦,睬都唔睬我,禮貌式招呼幾句都無,仲有乜點」。。。 

  但契媽同阿「未來外母」仍然唔死心,仲話實得,無問題。 

  點無問題法? 

  如是者我離開舖頭去做野,契媽What's app俾我,「你連外母個關都過埋,呢次睇你地喇!」 

  阿契媽,條女個關未過BOR! 

  下午,契媽又再What's app俾我,話阿「未來外母」要約我下星期一去燒野食,原因係阿「未來外父」生日,要一家人慶祝,佢個女都會到,唔出席就同我脫離契母子關係。。。。 

  咁即係有人已當我係一家人,怕未。 

  有得食我梗係去,但去到又發生咩事呢?下集話你知。 

註冊日期: 2019-10-19

 樓主| 發表於 2019-10-26 12:49 | 顯示全部樓層
「你連外母個關都過埋,呢次睇你喇!」 (下篇)

燒野食當日,狂風暴雨!燒嘢食先嚟落雨,似乎個天都唔鍾意我,唔知條女係咪都一樣唔鍾意我呢?

契媽話燒嘢食呢單嘢風雨不改,皆因燒烤場半露天有上蓋,唔知係唔係想我同佢姨甥女打風都打唔甩!

出門口前,我有話過阿媽知,我另一個阿媽介紹女仔我識,呢舖一出去可能兩個人返嚟,又或者入贅就番唔到嚟!情況有如荊軻刺秦皇一樣,視死如歸,風蕭蕭兮易水寒,壯士一去兮不復還。咁大雨,我本來想著對涼鞋算無謂噏住對腳,但阿媽話著涼鞋好無禮貌,一陣「未來外母」同條女唔高興就煩!於是我著了長牛仔褲、白襪兼新跑步鞋一對,務求俾個好印象外家!

落街行咗唔夠一分鐘,已受盡風吹雨打!對鞋連埋襪同對褲腳已經盡濕透,行每步路都好似澗水咁,真係舉步維艱,一步一驚心。

我仲記得,我去到燒烤場時,見到「未來外母」個女係著住條短褲兼涼鞋!呢次真係多得阿媽提醒!「你點解著新波鞋嚟呀,咁大雨咪整濕晒又烏糟!」妖,你「未來奶奶」叫架!可以預期,他日的婆媳關係仲差過2019年反送中時的警民關係,我就定必成為禍心直至壽終正寢!

造就機會 不能承受的煙

契媽同「未來外母」好識做,不停叫我同個女仔一齊去攞餐具、攞食物甚至買蛋糕。期間大家都無乜點講嘢,惟一佢問咗我一句「你一陣搭咩車走?」到咗無耐就問我點走,如同返新工第一日時就問「如果我唔做我應該向邊個辭職」一樣,聽都聽到幾很有誠意!

惟獨我好記得一幕,係買蛋糕個陣時。老老豆豆我見太多女仔都扭扭檸檸,做個決定好似非禮佢咁,但呢位女士就斬釘截鐵,一睇中個蛋糕就話買,果然係女中豪傑,我俾錢又點話呢。

個女仔成晚燒嘢食都無同我講過嘢,甚至望都好似無乜望過我,剩係望住個電視,無作大,個燒烤真係有電視仲開到鬼死咁大聲!「未來外母」猛叫個女埋嚟傾吓偈,都無乜反應,我同佢兩個仿忽活在平衡時空的人,點可以走埋一齊呢?

直至個女仔點起枝煙。

「未來外母」一見到個女食煙,嚇到彈起兼且面黑過包青天!好緊張咁同我講「我個女唔係成日食煙,唔係成日食煙」,「啊女你就食少啲煙啦」,驚死我會嚇怕咁話!

做咗咁多年毒男,連毒都唔怕點會怕你枝煙?我問個女仔攞枝煙嚟食,「未來外母」即刻開心番好多,仲話「你都食煙架?咁好咯,可以一齊食煙」!仲好似係個袋度拿幾條煙出嚟問我要唔要,呀「未來外母」,你唔係想用煙嚟做嫁妝吓話?

成晚就係咁悶悶悶咁過咗去,當然係我自己一個人返屋企,阿媽見到我個樣都好似知道晒成個過程咁,一句都無問過。我都無聯絡過個女仔,一切一切彷彿好似無發生過咁。

但故事未完喎。過咗兩個星期,契媽打電話嚟俾我!

「契仔,契姨有嘢同你講」!講乜春呀?

契姨:「做咩唔約我個女?」

我:「吓,點約呀?嗰晚都無乜反應就費事約啦!」

契姨:「唔係呀,我個女話悶呀,一個人走去睇戲呀,你又唔約佢,快啲約佢啦!嗱我無問過個女點架,你自己識做啦!」

我:「我搓my breast啦!」

之後,我真係what’s app俾個女仔,約佢吃飯,佢的回覆同佢阿媽完全相反,只係一句「遲啲覆你」,之後就再無覆過我!

好對唔住呀「未來外母」,呢一世我無緣做到你女婿了!但我都十分感激契媽同契姨,畢竟佢哋都咁愛錫我,撥到把大葵扇咁行,多謝。

事隔數年有次因工作關係,無可奈何下向過呢個女仔個阿哥求助借場拍攝,睇場時女士都在場,風采依然。不過皮膚好似仲差咗,攝影師同我講,以為個男士係細佬,女士係家姐。再有次同契媽契爺飲茶,都有提起呢單嘢,契爺的意見係「佢都唔識打扮,成個男人咁」,隔咗幾年都好似仲未嫁!

後記:

曾問過女士介唔介意睇吓呢段文俾回應,佢只係回應咗一句「如果我介意你係咪唔寫?」當時已剛剛寫好。換句話說,呢個故事係未經佢face check就出街。

在Facebook睇到女士好似轉左性向,剪勁短頭髮同另一女士攬住影好多相。無論如何,我都祝福她與伴侶有愉快的一生。
您需要登錄後才可以回帖 登錄 | 註冊

News
Feature
Blog
Load more
 
NOTIFICATION