{ LIFESTYLE }
23 Oct 2020
【拆彈專家2】「雙影帝」相隔18年再合作默契不減 戲外無所不談  

由「雙影帝」組合劉德華、劉青雲,聯同內地女星倪妮領銜主演的寰宇巨製《拆彈專家22020年壓軸登場,今次是華仔、青雲繼《嚦咕嚦咕新年財》後,相隔18年再度合作,於大銀幕前正面交鋒,亦敵亦友,二人在戲外則無所不談,儼如「老朋友」一樣。





 

相隔多年再跟華仔碰頭,青雲直言兩人默契依然:「時間多與少跟默契沒有關係,有些演員會特別有火花,等於今次《拆彈專家2》,大家有共同理念。」華仔也認為人與人之間的緣分很特別,「每次跟不同演員合作,好似入行初期同發哥(周潤發)等演員合作都會有特別默契,就算鏡頭冇特別交代是兩兄弟,出來感覺都會畀人是兩兄弟,呢個係演員間的化學作用,正如青雲同倪妮有一場戲,我在旁邊看,令我覺得『嘩』,成套電影充滿了演員嘅努力,有意想不到嘅驚喜!」





 

《拆彈專家2》中有連場槍戰、爆破、武打等場面,問到兩位影帝最難忘的拍攝場面,青雲坦言是當中一場「拯救」戲,二人登上一輛貨van,然後由吊臂將貨van吊上八層樓高,青雲說:「雖然導演有話吊高,但冇講會吊幾高,拍攝時候123就吊咗上去,我仲諗住會慢慢試,點知一take完成。」身旁華仔聞言即指:「雖然係好快,但見武指佢哋好認真,每次吊之前都會檢查條威吔有冇受損,以前拍戲就搵命博,而家會覺得被照顧,安全感好大。」

 



雖然貨van一幕場面是驚險,不過最令華仔印象深刻卻是另一幕:「我最深刻反而係第一次同青雲開工,感覺好新鮮,好似見番個舊朋友咁,十幾年前合作嘅感覺番晒嚟!」在過往的電影中,華仔與青雲,先後飾演過拆彈專家,不過《拆彈專家2》不約而同令他們有不同的體會,青雲說:「好多年前我演嘅拆彈專家,是帶有喜劇感,今次是實牙實齒嘅拆彈專家,有好複雜嘅行動同大型嘅爆炸,而且今次帶出一個訊息,有啲嘢失去咗係搵唔番。」



華仔亦表示今次電影充滿令人反思的訊息,就連他亦有所覺悟:「意外同明天,大家唔會知道邊樣出現先,角色中嘅我,經常緬懷過去,然後又會話將來要點點點,但其實最重要嘅唔係過去、唔係將來,係現在,同時亦帶出世界上最危險嘅炸彈其實係人性。」

 


News
Feature
Blog
Load more
 
NOTIFICATION